Arzı Hal İtdim Sana

Arz-ı hâl itdim sana nazm ile çün (ben) ey Hudâ Suçlıyam hem sâ’ilem geldim niyâza kapuna **** Şu cihânda çekdiğim mihnetleri keffâret it Ben güneh-kâr kulunı sen mağfiret eyle şehâ **** Akuben sulb-ı pederden düşdüm ana rahmine Ben cenîn oldum ana rahminde çekdim çok cefâ **** Doğdığım sâ’atde çekmişem meşakkat cüz’i ben Tıfl iken çok itmişem anam kucağında bükâ **** Bilmeyüb vakt-i sabâda işledim suç bî-hisâb Urdılar te’dîb içün bana nice yumruk ‘asâ **** İricek vakt-ı bülûğa doldı ışkın gönlime Başladım yanmağa ‘ışk âteşine subh u mesâ **** Gezdim ol sevdâ ile Şâmı Hicâzı Rûmi heb Yaşım ol demde yigirmi idi ma’lûmdur sana **** Kârbâna hem karışmak istemez vahşî idim Yalınuz yayan yürümek hoş gelür idi bana **** Rûma geldim çok tezevvüc eyledim nefse uyub İtdiler meftun beni şehvet hevâ hubb-ı nisâ **** Nâsa itdim pes nasîhat bana düşmân oldılar Gördüm anlardan hisâbsız gam sitem derd ü belâ **** Kocayub ‘âciz kaluben eyledim nâsdan fırâr Ehl ü evlâd kavm u kardaş bana iderler cefâ **** Hem bu hâlde bulmadım şöhret belâsından halâs Eylerem halk-ı zemândan ey şehen-şâh iştikâ **** İrmek isterler yüzümden mâ-sivâya ekseri İstemezler cân u dilden ‘ışk u ‘irfân-ı Hudâ **** Eskidi şimdi kafes yok iktidârım ülfete Kûşe-i vahdetde buldum zikr ü fikrimde safâ **** Dir bu Kuddûsî habîbin şehrini ârzûlayub Rûhumı al anda yâ Rabbe’n-nebiyyi’l-müctebâ Ahmed Kuddusi