Aşıka Gelmez Kanaat

Aşıka gelmez kanâ’at ‘ışkı derya olsa da Hem usanmaz mübtelâsı halka rüsvâ olsa da **** İdemez idrâk anın esrârını ‘akl-ı beşer Zâhidin kalbine sığmaz zerre-âsâ olsa da **** Nûr-ı şemsi kör ne bilsün ider inkâr dâ’imâ Gözi açık olana zâhir hüveydâ olsa da **** Şol ki açıkdır basîret gözi ‘arşı seyr ider Her ne denlü cümle göklerden mu’allâ olsa da **** Keşf-i eşyâ eyleyen kalb gözidir ‘ayne’l-yakîn Baş göziyle Hak’bilinmez bellü peyda olsa da **** Açılur zikr-ile kalb gözi devam it sen ana ‘Ârif olmaz kişi nahv ü sarfda yekta olsa da **** ‘İlm-i zâhir ehli Allahı bilür ‘ilme’l-yakîn Bilemez ‘ayne’l-yakîn her fenne dânâ olsa da **** Ma’rifetden zerre mikdârı olamaz hisse-yâb Okusa bin cild kitâb hem ehl-i takvâ olsa da **** Kalbde ‘irfan hâsıl olmaz zühd ile Kuddûsîyâ Dahi ider ‘uşşâka zâhid kendi a’mâ olsa da Ahmed Kuddusi