Baştan Başa Seyret

Başdan başa seyret halk-ı cihânı Ma’lûm ola âşikâre nihânı Ne renge boyanmış efrâd-ı zamân Bir kerre keşf eyle devr-i zamânı ‘Ulemâ sulehâ çekildi gitdi Herbiri merâm-ı maksûda yitdi Ay tutuldu günün zıyâsı bitdi Bulamazsın bir duracak mekânı Bir gör ne ‘âlemdir ebnâ-yı beşer Ekserîsi biri birinden eşer Bakar bize bugün kâfirler şaşar İslâmlar gezdirir tâze nisvânı Nûrunu nâr etmiş küfür kemendin Boynuna bırakmış kolalı bendin Alafrangada beğenmiş kendin Küfr ile doldurmuş İslâmistânı Erkekleri ırak olmuş rahmetden Dişileri münezzehdir ‘iffetden Şerî’ati bırakmışlar zimmetden Muktedâ etmişler nefs ü şeytânı Humar hamir meydânları doldurmuş Fi’l-i zinâ yüzlerini güldürmüş Enva’-ı ‘ısyânı şeytân buldurmuş Bu rezâlet doldurmuşdur meydânı Nisâlarda zerre hayâ bulunmaz Nisâsız ‘işretsiz meclis olunmaz İş karışmış bugün önü alınmaz Meğer ki erişe kahr-ı Sübhânî Mescidlere bugün necâset doldu Er olan erenler peyderpey öldü Bu dîn-i İslâm’ın gülleri soldu Görün ne gösterir hükm-i Rabbânî ‘Uryan avretleri iftihâr ile Gezdirir berâber i’tibâr ile Gösterir her yerin iştihâr ile Aslâ kabûl etmez emr-i Kur`ân’ı Bu kadar bunları seyreder bu nâs Bu nâsdan kurulmuş elbet bu esâs Bunlar cemâ’atdir kumandan vesvâs Taşlarda mevcûddur küfr ü tuğyânı Zikr-i lisân bugün deyyûs teresdir Cümlesi fâsıkdır şehvet-perestdir Fi’l-i fücûr husret oğlu merestdir Ta’mîr eylemişler dâr-ı husrânı İki para etmez bir ferd-i leîm Âmir-i mahlûka olmuşdur ta’yîn Küfr ü zulmet dolmuş bu rûy-i zemîn Bu halde bırakmaz Hakk’ın fermânı Lutfî gamdâr olma yakındır şafak Hakk Kerîm’dir tebdîl olur bu siyâk İnşallah kahr olur efrâd-ı nifâk Munkatı’ olur mu Hakk’ın ihsânı