Bir Nazar Eyleyin

Bir nazar eyleyin devr-i zemâne Kârbân-ı İslâm çekildi gitdi Hak yardım eylesün ehl-i îmâne Hep ricâl-i kirâm çekildi gitdi **** Ehl-i tevhîd bugün ne garîb kaldı Derde şifâ veren ne tabîb kaldı Hilm ü hayâ ile ne edîb kaldı Ulemâ-yı ızâm çekildi gitdi **** Mü’min ü muvahhid az az bulunur Şer-‘i şerîf bâzan süâl olunur Gâhı gâh fetvâdan haber alınur Kemâl ü ihtirâm çekildi gitdi **** Hani yüzü nurlu ümmet-i Ahmed Meyânda munkatı‘ şer-‘i Muhammed Zâtında Sabûr’dur Allahü Ehad Bu dinden intizâm çekildi gitdi **** Vallahi açıkdır tevbe kapısı Bu kâinât bütün Hakk’ın yapısı Afv olunur günâhların hepisi Tevbeye ihtimâm çekildi gitdi **** İttibâ-ı hevâ aldı derûnu Tarîk-ı şeyâtîn dutdu berûnu Doldurdu karnına kanı irini Fark-ı helâl harâm çekildi gitdi **** Kal‘ oldu kalblerden envâr-ı îmân Kesildi dillerden rızâ-yı Rahmân İylik tarafına görünmez gümân Salât ile selâm çekildi gitdi **** Nisâlar ricâle emîr oldular Ricâl gibi meydânlara doldular Şeyâtînin ocağını kurdular Hak yoluna devâm çekildi gitdi **** Lutfi gaflet ile karardı âlem Bahr-i gafletdedir ebnâ-yı âdem Artmada şekāvet hayfâ dem-â-dem Sıyâm ile kıyâm çekildi gitdi Alvarlı Efe Muhammed Lütfi Hazretleri