Dilemez Aşıkan İçinde Aşık Bülbülane

Dilemez ‘âşıkân içinde ‘âşık bülbülâne Diler ma’şûkı zîrâ kıymaz asla cism ü cana **** Fidâ itmek gerek pervâne-veş varını yâre Aña ‘âşık dinür ancak ki şem’e karşu yana **** Hezârân âferînler âb-ı ‘ışk-ıla nigârın Ne deñlü var ise ağyarını dilden yuyana **** Uyub ‘akl-ı ma’âşa ahmak u bî-aklı gör kim Sanub özini pes ‘arif düşer zann u gümâna **** Reva mıdır saña ey müftî-yi mâcin bu rütbe ‘Adavet eyleyüb tersâ dimek kars müslimâna **** Küdûret virme bizim gönlümüze ebsem olgıl Ki te’sîr eylemez va’zın gürûh-ı ‘âşıkâna **** Visâl-i yâri umarsın riya vü zevk-ile sen Müyesser olmaz ol vallahi illâ muhlisâna **** ‘Ulüvv-i kadrini bilüb be-küllî halk-ı ‘âlem Kamusı dir ki ‘ışk olsun bu ‘ışk sırrın tuyana **** Melâ’ik dahi ins ü cin iderler cümle gıbta Erenler sofrasında hûnına ‘ışkın toyana **** Ne ulu bahtı var anın ki ‘ışka ola nâ’il Ne a’lâ kadri var anın ki bu renge boyana **** Sala şol terk-i terk idüb giren meydân-ı ‘ışka Dahi canını îsâr eyleyüb cana kıyana **** Virilmez tab’ı câmid zahide bil ni’met-i ‘ışk Tayanub zühd ü takvasına ol uğrar ziyana **** Ne mümkindir bu ‘ışkın sırrını vasf eyleye dil Ki bir deryâ-yı a’zamdır sığar mı hîç beyâna **** Cemî’-i enbiyânın evliyanın yâri ‘ışkdır Değişmez anı Kuddûsî na’îm-i dü cihâna Ahmed Kuddusi