Olduğun Bilmez

O âdemler ki âdem külli ‘âlem olduğun bilmez Muhakkak ‘âlem ü âdeme bir dem olduğun bilmez Haberdâr olmamışsa “alleme’l-esmâ” rumûzundan Benî âdemse de âdem mükerrem olduğun bilmez Sabâh-ı Hakk’ı idrâk etmeyen tahmîr-i tıynetde Zuhûr-ı âdemin ‘âlemden akdem olduğun bilmez Temâşâ etmeyen dîdâr-ı Hakk’ı vech-i âdemde Gönül nâmında bir beyt-i mu’azzam olduğun bilmez Cidâl ü kâl ile vahdet-şinâsım zann eden âdem O sırrın ehl-i hâle feyz-i mülhem olduğun bilmez Kitâb-ı bî-hurûf-ı ‘aşkdan ders almayan zâhid Okur âyâtı elfâz ile muhkem olduğun bilmez Bilir bilmez edenler güft u gû sırr-ı hüviyyetden ‘Acebdir vâkıf-ı esrârın ebkem olduğun bilmez Beşerde kâinâtı mündemiç bilmezse bir kimse Şümûsun zerrelerde katrede yem olduğun bilmez Nazar-endâz-ı ‘ibret olmayan âfâk u enfüsde Zemîn ü âsumân levh-i mücessem olduğun bilmez Kelîmi zannedenler rü’yet-i dîdârdan mahrûm “Terânî len terânî” içre müdgam olduğun bilmez Mesâib ‘âşıka ‘ayn-ı münâsib bilmeyen dânâ Ser-i dâr-ı belâ bir kürsî-i cem olduğun bilmez Eden hâlât-ı ‘aşk-ı yâri kıyl ü kâl ile ta’rîf Meyân-ı dîde vü dil sırr-ı mübhem olduğun bilmez Cihânda var mıdır şâh u gedâdan Molla Hünkâr’ı Serîr-i ‘aşkda sultân-ı efham olduğun bilmez Olanlar kasr-ı bî-bünyâd-ı câh u devlete meftûn Meğer iklîm-i fakrın cây-ı hürrem olduğun bilmez O hûnîler ki halka cevr eder cüz’î sitem görse ‘Adâlet-hâh olur nefsinde azlem olduğun bilmez Gazeller nazm eder taltîf eder intâk için İffet Sükûtun Remzî-i nâ-çâra elzem olduğun bilmez