Olunmaz(Bugün Işk Ila Kim)

Bugün ‘ışk-ıla kim nâlân olunmaz Yarın vuslat bulub handan olunmaz **** Temellük eyleyüb yalvar Hudâya Anın babında hîç hırmân olunmaz **** Tefekkür eyle masnû’ında Hakkın Ne var ‘âlemde ki bürhân olunmaz **** Hudâdan gâfıl olma tarfetü’l-‘ayn Huzûrsız bendelik bir an olunmaz **** Şerî’atsiz tarikat işi bitmez Hakîkat sırrı hem tibyân olunmaz **** Hilafın işle ‘âdât-ı ‘avamın Hevâya uyma kim iz’ân olunmaz **** Tama’dan ictinâb idüb ganî ol Kanâ’at kenzi hîç tâlân olunmaz **** İlin ‘aybını görme kendine bak Suçum bilene hizlân olunmaz **** Sana kemlik idene eyle ihsan ‘Afiv olmasa ‘âlî-şân olunmaz **** Ne dirlerse disünler kıl tahammül Sabırsızlıkla dervîşân olunmaz **** Dem-â-dem toklığı ‘âdet idinme Karın aç olıcak tuğyan olunmaz **** Zemine halkına keşf itme razı Ki a’dâya silâh ihsan olunmaz **** Yüzine her gülen zann eyleme dost Nifak ehli ile yârân olunmaz **** İder bir ‘aybını gördikde ifşa Karîn-i su’a itmînân olunmaz **** Bu halkdan ‘uzlet it Hakkı bulasın Ki hultat ile yol âsân olunmaz **** ‘Alâ’ik fitnesinden kurtulana Kıyâmetde hisâb mîzân olunmaz **** Mücâhid ol mücâhid ol mücâhid Cehidsiz nâ’il-i ferzân olunmaz **** Reva mı subha dek yatub uyuman Dün ü gün hâb ile merdân olunmaz **** Taleb kıl sen de Kuddûsî bu’ışkı Ki ansız sâhib-i ‘irfan olunmaz Ahmed Kuddusi