Çünki Dünya Darım Teşrif

Çünki dünyâ dârını teşrîf idüb basdı kadem Ol Safiyullah ki Adem çekdi nice hüzn ü gam **** Enbiyânın cümlesi dürlü belâlar çekdiler Hem Hudânın dostı ‘âlem fahri şâh-ı muhterem **** Çâr-yâr-ı Mustafâ Sıddîk ‘Ömer ‘Osmân ‘Alî Al ü ashâb çekdiler dünyâda gûnâ-gûn elem **** Cümle ümmet rütbesince gam yükin yüklendiler Sen dilersin dâr-ı mihnetde safâ vü ‘îş ü dem **** Hasteye acı devâlar yidirir çünki tabîb Sabr idüb anı yir ise ‘âfiyet bulur dedem **** Didi Peygamber ki mü’min üç belâdan boş değil Biri zillet biri kıllet birisi dahi sekam **** Olmasa inşânda bu üç nesne bil tuğyân ider Nefs ü şeytân leşkeri bunlarla olur müntakam **** ‘İzzet ü sıhhat dahi mâl mü’mini müşrik ider Bunlara nâ’il olub Fir’avn didi ben Tenriyem **** Dostlarına anları virmez Hudâ-yı Lem-Yezel Her kime virdiyse zîrâ oldı anın hâli kem **** ‘Âkil ü dânâ olan anlarla itmez iftihâr Çünki anlar ehl-i istidrâca virilür hocam **** Kahr içinde gizlemiş Hallâk-ı ‘âlem lutfını Sûretâ ni’met görinen fi’l-hakîka heb nikam **** Yedi yirde mü’minin kalmaz günâhı arınur Sıdk-ıla dinle ki anları sana bir bir diyem **** Cümle dünyâda çekilen derd belâ mihnet keder Zenbine keffâret olur görmez uhrâda sedem **** Anlar-ile gitmeyüb kalur ise cüz’î günâh Cân virirken çekdiği zahmet kabir içinde hem **** Dahi mîzânda hisâbda hem sırâtda çekdiği Mü’minin zenbine keffâret olur ey ibn-i ‘am **** Gâyet ile çok olub cürmi biraz kalur ise Yanuban dûzahda sonra virilür bî-had ni’am **** Nev’-i insânda terakkî var melekde yok imiş Bu terakkiye sebeb mihnet meşakkat gussa gam **** Îtme Hâlikdan şikâyet halka sâbir ol hemân Var-durur her bir belâda nice esrâr ü hikem **** Tâ’at ü ‘ilm ü ‘amel takvâ kerâmet gerçi hûb Sâhibi ‘ucba düşer ise olur merdûd o dem **** Kibrin esbâbından olubdur bu mezkûrlar kamu Kim tekebbür eyler ise olur alçak lâ-cerem **** Sırrını tuy kadrini bil fakr u zili ü ‘illetin Anları dostlarına ihsân ider ancak Hakem **** Her neden ki hoşlanursa nefsin ol şerdür sakın Anın ikrâh itdiği nesne hayırdur itme zem **** ‘Afiyet iste Hudâdan sen dahi Kuddûsîyâ Bir belâ geldikde sabr it bul terakkî dem-be-dem Ahmed Kuddusi