Eğer Bitsün İşim Dirsen

Eğer bitsün işim dirsen gice gündüz hemân ağla Virir maksûdını elbetde Hallâk-ı cihan ağla **** Du’ânın kıblesi çünki semâdır sen hemân dâ’im Semâya destini ref eyleyüb di el-emân ağla **** Budur ‘âdet ki hüzn-ile muradına irer tâlib Hudâya vuslat istersen hemân turma ki kan ağla **** Ferah eyle kimi gördün bağışlanmış hatî’âtı Suçunı i’tirâf it iste Hannândan hanân ağla **** Eğer ‘âşık isen dîdârına dildârın ey sâlik Cinânın arzusından geç hemîn ‘ışk-ıla yan ağla **** Meseldir ağlayan düşde güler uyanıcak dirler Yarın olmak dilersen âhiretde şâd-mân ağla **** Nişanı ehl-i ‘ışkın ağlamakdır derd-i ‘ışk-ıla Sakın zâhidleyin olma ki sen de bî-nişân ağla **** Muradı ağlamakdan ‘âbidin cennet imiş ancak Yaraşmaz ‘âşıka ücret hemân sen rây-gân ağla **** Melikdir bendenin maksûd-ı aksâsı değil mülki Sivâyı ko Hudâ içün beher dem her zemân ağla **** Riyâ olmaz gürûh-ı ‘âşıkânda zerre mikdârı Gözünden seller aksun aşikâr ağla nihân ağla **** Ferâ’izde kusur itme nevâfille tekarrüb kıl Kula kulluk gerek kardaş virüb cânâna cân ağla **** Tefekkür eyle masnû’unda ki Hallâk Te’âlânın Basiret gözin açılsun görüb anı ‘ayan ağla **** Mukarrebler bükâ ile tekarrüb itdiler Hakka Dahi ağladı hüzn-ile Resûl-i ins ü cin ağla **** Lisânın zikre meşgul ola Kuddûsî gönül fikre Dem-â-dem ‘andelîb-âsâ idüb âh u figân ağla Ahmed Kuddusi