Eğer Hak İse Maksudun

Eğer Hak ise maksûdun karışma sû’-yı akrana Bu vaktin ehlinin meyli hemân ağyâr-ı Yezdâna **** Gürûh-ı evliyâullah bilinmez oldılar şimdi Gezerler nâsın içinde hakîrâne fakîrâne **** Zuhûr güni değil bu gün sakın şöhretden ey sâlik Tezellül it tesettür it tevâzu’ eyle ihvâna **** Özini cümleden alçak bilüb da’vâyı terk eyle Tekessürden temâcüdden hazer kıl uyma şeytâna **** Hudânın kubbeler altında gizlü evliyâsı çok Di her kimi görürsen bu velîdir dime bîgâne **** Sıfatlanurlar imiş evliyâ nâsın sıfâtıyla Bize lâyık olan itmek mahabbet ehl-i îmâna **** Onların ba’zı ef âli muhâlif görinür şer’e Anın sırrı olur ma’lûm güruh-ı ehl-i ‘irfana **** Kaçub Mecnûn gibi anlar ‘avamdan vahşet iderler Görişmezler kavuşmazlar karışmazlar her insana **** Eğer anın biri itse zuhûr işbu vakitlerde Gelür halk yedi iklîmdeıı kılarlar ‘âsî Rahmâna **** Kimisi tâlib-i dünyâ kimisi tâlib-i ‘ukbâ Gönüller uğrıları heb görinürler sadîkâne **** Kalîldür ‘âşık-ı Mevlâ benim gibi yalancı çok Alışmış dillerimiz gıybet ü bühtân ü yalana **** Nasîhat itse bir nâsıh muhibbi yâr-ı garına Îder ‘isyân olur düşman gazûbâne ‘abûsâne **** Hudânın oldığı içün nişânı bilmesi âsân Ki cümle halk nişân ana bil(in)sün ‘aklı olana **** Velînin yok nişânı hîç Hudânın gayrisi bilmez Anı bildirmemiş Mevlâ ne dânâya ne nâdâna **** Sorarsan hikmetin anın bizi hıfz u himâyetdür ‘Abes mi zann idersin yohsa sen bu işi dîvâne ***** Ki insân biri birine cefâ vü cevre mecbûldür İderler lâ-cerem cevr ü cefâ düşmâna yârâna **** Bilürken evliyâyı cevr iden olur helâk ol dem Eğer bilmez ise kalur cezâsı ulu dîvâna **** Anınçün gizlemiş Hak evliyâsın dâr-ı dünyâda Diyen bu sözi ehlullah-durur zann itme efsâne **** Sene bin iki yüz elli dahi altıdır ey kardaş Yaşım yitmiş ikiye irdi muhtâc oldum ihsâna **** Du’â matlûbum ancak sanmanız kim cîfe-i dünyâ Karışdırsun beni fazlıyla Mevlâ hizb-i merdâna **** Selâmet bulayım dirsen eğer dâreynde Kuddûsî Firâr eyle kamu nâsdan devam it zikr-i Mennâna Ahmed Kuddusi