Sakın Aldanma Kardaş

Sakın aldanma kardaş u ‘azîzim gel bu dünyâya Ki ol mekkâredir zîrâ salar başını gavgâya **** Ana dil virüben cem’ eyleyen oldı cüdâ Hakdan Kulak tut nutkumı dinle gider dîn yohsa yağmaya **** Resûlullah hadîsinde buyurmış cîfedir dünyâ Kilâbdır dahi tullâbı virir Hak anı a’dâya **** Ve buyurmış ki dünyâ hubbıdır başı kamu zenbin Hudâ-yı Lem-Yezel virmez anı hizb-i ehibbâya **** Anı dostlarına dahi virir Mevlâ dir isen bil Gönül virmezler anlar hîç ne dünyâya ne ‘ukbâya **** Kişi bir dilber-i ra’nâyı sevse cân u gönülden Yanar ‘ışkı ile anın düşer mi gayrı sevdâya **** Kifâf mikdârına üç nesnenin râzî vü kâni’ ol Biri mesken biri melbes dahi bir kas’a çorbaya **** Buhulden ihtirâz eyle bahîlı çünki Hak sevmez Sever cömerdi hem idhâl ider cennât-ı ‘ulyâya **** Elinde var iken fursat hemân sa’y-i belîg eyle Sa’âdet bulayım dirsen işini koyma ferdâya **** Kamudan nefsini alçak tutub eyle tevâzu’ sen Bu râhın ehline çünki tevâzu’ oldı sermâye **** Hudânın ni’metini hem suçunı i’tirâf eyle Güvenme zerre mikdârı kemâl ü zühd ü takvâya **** Günâhım çok deyü kesme ümîdi bahr-ı rahmetden Ki ‘afv olunsa heb gümrâh nakıs gelmez o deryâya **** Bulub bir şeyh-i kâmil gir erenler gitdiği râha Olur kalbinde hâsıl ‘ışk ki oldur vuslata mâya **** Şerî’atsız tarîkat işi bitmek mümteni’ zîrâ O bir kapu ki andan irilür maksûd-ı aksâya **** Ana kim ki ider ta’zîm odur mü’min velî Hakka Dahi mülhid münâfık şol ki uymaz şer’-i zîbâya **** Buyurmışdur Resûlullah kaçın siz ehl-i ilhâddan Uyuz gibi sirayet eyler ol lâ-büd esihhâya **** Tefekkür eyle âyâtında hem Hallâk-ı ekvânın Dilinden zikrini kesme irersin câh-ı bâlâya **** Hudâdan iste gel ‘ışk-ı hakîkî geç mecâzîden Nedâmet eyledi Mecnûn sonunda ‘ışk-ı Leylâya **** Nasîhat itdi Kuddûsî sana bu on tokuz beytde Tutarsan vâsıl olursın anı bî-şübhe Mevlâya Ahmed Kuddusi