Tesmiye Kıldı Erenler Bor İken Nur Adını

Tesmiye kıldı erenler Bor iken Nûr adını İtdi çok zîrâ Hudâ ‘uşşâkını ‘ubbâdını **** Ekserî halk-ı mesâkin ü ‘avâciz ise de Gönderir Rezzâk-ı ‘âlem cümlesinin zâdını **** ‘Alimi çok tâlibi çok ez-kadîm hem sâlihi Zâkiri çok eylemez terk rûz u şeb evzârını **** Kâdirî sâliklerinden oluban uyandılar Heb severler kendini Geylânını Bağdâdını **** Çoğı çulha rencberi çok ağniyâsı borçlu hem Kesmesün Mevla o kavmin ‘avnini imdâdını **** Bid’ati az zîneti az sâ’ire nisbet ile Nâsihin pendin tutarlar mürşidin irşâdını **** ‘Afvı gâlib kezmi gâlib kîn ‘adâvet tutmayub Biri birinin temennî eylemez berbâdını **** Çün peder merhûm iderdi anı tercih Mar’aşa Görüben kurrâsını huffâzını zühhâdını **** Görmedim hîç böyle bir kavm ki zekâtların virir Hak Te’âlâ eylemiş çok anların hussâdını **** Köyleri çok imiş evvel cümlesi olmuş harâb Eyleyüb vîrân harâmîler kamu bünyâdını **** Eylesün rahmet Hudâ ‘Abdülmecîd sultâna kim Kahrı ihlâk eyledi yer yüzinin bî-dâdını **** Oğlu Mahmûd Hânı da mansûr muzaffer eylesün Hem muvaffak eylesün anı dahi evlâdını **** Rahmet itsün hem kamu ecdâdına eslâfına Dû cihânda saklasun Mevlâ anın ecdâdını **** Hoş tecellî eylemiş ol nesl-i pâke zü’l-Celâl Hem zahîr itmiş kamu aktâbını evtâdını **** Sâhibi yokdur Hudâdan gayrı işbu beldenin Kahr u ihlâk eylesün Mevlâ anın hussâdını **** İçlerine bir garîb gelse unudur beldesin Gezdirüb seyr itdirirler bakce-i âbâdını **** Eyledi Türkmânca medhini Kuddûsî anın Medh ider her kim görürse bâg u mâ’ ü bâdını Ahmed Kuddusi