Vaslını Bize Müyesser Eyle

Vaslını bize müyesser eyle ey dildarımız, Firkatin odına yandık âh ü efgân kârımız! İşledik gerçi hatayâ nefs ü şeytana uyub, Hiç zarar verir mi sana bu bizim evzârımız! Pîşemiz ancak bizim sevh ü zelel cürm ü hata, Sen ayıplar örtücüsün ey bizim Settârımız! Ağlayûben kapına geldik bir takım gümrahlarız, Varlığına birliğine yok durur inkârımız! Biz Elestü bezminde peymân eyledik sen Şah ile, Bozulur mu hiç bizim ol ahdimiz ikrarımız! İhtiyâr-ı fakr edib girdik yoluna sıdk ile, Çekmeyiz derd aşkımız var yoğ ise dinârımız! Gönlümüz dillendi husn-ü vechini işideli, Bâd-i aşk estikce zirâ şûlelendi nârımız! Der ki Kuddûsî, bizim suçlarımız çoğ ise de, Kesmeyiz her giz recâyı çünki var Ğaffârımız!