Çok Darı Fenanın Kederü Hemmi Deminden

Çok dâr-ı fenânın keder ü hemmi deminden Usandım anın mihnet ü hüzn ü eleminden **** Bakdım dün ü gün hîç kuru gavgâsı dükenmez Çekdim elimi şimdi kamu yahşi keminden **** Tüccâr kati hırsa düşüben mâlı direrler Mevti unudub cîfe-yi murdâr u haminden **** İt gibi iderler biri biriyle şemâtet Hoşlanmadım ebnâ-yı zamânın şiyeminden **** Dînân tutarlar atuban dîni yabana Gelmez şiba’ anlara bu dünyâ deseminden **** Muhtâcları gördikde tonar yüzleri buz-veş Anlar da dönüb girü kaçarlar şiyeminden **** A’yân-ı bilâd çevre meyil eylediler heb Zulm-ile cihân toldı vülâtın reşeminden **** Yok havf-ı Hudâ havf-ı melik zerrece aslâ Bezdi fukarâ cân u metâ’ u ganeminden **** Küffâr buluben fürce nice beldeler aldı İblîs-i la’în eyledi iğvâ saneminden **** Sultâna da hîç sıdk-ıla bir tâ’at ider yok Etbâ’ u re’âyâ vü cüyûş u hademinden **** İtmez vüzerâ nusret-i dîn cân u gönülden Feth olmadığı pes rü’esânın daceminden **** Vay hâline hak söyleyenin böyle zemânda Korkar ‘ulemâ çünki kuzâtın kaleminden **** Hultatda hatar sâlike çokdur bu ‘asırda Pes ‘uzlet iden sâlim olur halk siteminden **** Dîn gayreti çekmez ne ‘aceb ekseri nâsın Az kaldı gelen hayr u nefi’ dest ü feminden **** Techîz-i guzât eyleyeni Hak idinir dost Hak dostlığı yeğ iki cihânın ni’metinden **** Bir akça bahîl virse gider cânı berâber Altun ana kıymetli tamar içre deminden **** Bu mâlı Hudâ virdi diyüb gâzîye virmez Virirse hazân gibi sararır nedeminden **** Zabt eylediler ‘arsa-yı merdânı gabîler Erbâb-ı ‘akıl cümlesi hayrân se’eminden **** Virildi münâsib cühelâ vü bülehâya Sorulmaz imiş Hâlik-ı kevnin hikmetinden **** Teslîm-i umûr eylediler anlara ki hîç Yok sevgilü şey mey-kedenin câm-ı ceminden **** Dîn düşmeni pek itdi hücûm iki tarafdan Tağ taş iniler top u tüfengin zememinden **** Yalvaralım ol Tenri Te’âlâya ki bizi Hıfz eyleye fazlı ile kahr u edaminden **** ‘Avn eyleye sultânımıza ‘askerine hem Mağlûb ola düşmânlan şevk-i haşeminden **** Şol rütbe hemân kalblerine toldıra ru’bı Ki ditreyeler heybet-i tabi u ‘aleminden **** Teştît ide cem’iyyet-i kübrâlannı heb Bir katrece ilkâ ide bahr-i nikaminden **** Gâzîlere in’âm ide çok mâl ü ganîmet Zer sîm ü cevâhir ni’amin bâ-kıyeminden **** Sultânı vü etbâ’ını iğnâ ide şol kez Ki bula gınâ cümlesi bâlâ himmetinden **** Yardımcı kıla rûh-ı şerifini Resûlün Yârânını hem müntahab u muhtereminden **** İnzâl-i melâ’ik ide cenk eyleyeler hem Ervâh-ı gürûh-ı şühedâ muhteşeminden **** İrsâl ide kutbı dahi a’vânını cümle Yir üzre olan ümmet-i hayrü’l-ümeminden **** Hem cümleye gayret vire ki emr-i cihâdı Yir yir tutuban kurtılavuz harb zeheminden **** Yalvaralım evkât-ı seherlerde diyüb hem Yâ Rabbi necât vir bize dâreyn zuleminden **** Şu zulmet-i müstenfereden it dahi tahlîs Hıfz it bizi ahzâb-ı ‘adûnın vahaminden **** Rahm itmeyicek sen bize yâ kim ide bugün Çün muztarib olduk katı küffâr haveminden **** Bu kürbeyi bizden bu sene eyle ki tefrîc Tîz kurtılalım savlet-i a’dâ hazeminden **** Gümrâhlığ-ıla başımıza geldi bu hâller Neşr it bize nebzece hilimin diyeminden **** İblîse uyub râh-ı dalâle sefer itdik İşidemeyüb hak sözi nefsin sameminden **** Ol şâh-ı rüsül hürmetine eyle sıyânet Bizi vü kamu ümmeti hışmın deheminden **** Kat’ itmeyiz elbetde ümîdi ki umarız Sen pâdişâhın bahr-i hanân u kereminden **** Noksân mı gelür rahmetine ey ulu Yezdân Geçsen bir avıç hâk-i sefâlin töheminden **** Sultâna rahim eyle husûsen ki olubdur Dîn uğrına dil hastesi fart-ı hazeminden **** Terk eyledi ecdâdı gibi hâb u safâyı Küffâra gazab ümmete lutf u rahaminden **** Çün ümmet-i merhûmeye itdin anı sultân Bu hızmet-i ‘uzmâya kemâl-i zememinden **** Senden dileriz ki idesin feyzini itmâm Kuvvet bula dîn şevket-i câh-ı ‘izamından **** Târîh-i sene bin iki yüz kırk dahi dörtdür Mevlâya sığındık gazevâtın ceşeminden **** Kaldı işimiz ana dileriz ki selâmet Vire bize şu fitne-i ‘uzmâ dareminden **** Kuddûsî-yi bî-çâre niyâz eyleyüben dir Ey Hak bizi kurtar şu zamânın gaseminden Ahmed Kuddusi