Dimiş Hakkın Resuli Basafası

Dimiş Hakkın Resûl-i bâ-safâsı Beher derdin cihânda var devâsı **** Günâh derdine istiğfâr devâdur Ki Mevlânın bize ulu ‘atâsı **** Devâm iden ana mağfûr olur çün Çün eyler mağfiret anı Hudâsı **** Beher gün it yüz istiğfân zîrâ İderdi böyle Hakkın Mustafâsı **** Gelürse başına dünyâda sıklet Yidi yüz kerredir bil müntehâsı **** Murâd hâsıl olıcak yüze indir Anı terk itme artsun kalb cilâsı **** Günâh-kârâne istiğfâr emândur Anınla def olur cümle belâsı **** Günâh-kârdur bu ümmet Hak Gafurdur Dimiş hem ol Hudânın âşinâsı **** Günâh işlenmede var dürlü hikmet Diyendir asfiyânın pîşvâsı **** Yimese dâneyi cennetde Adem Olur mıydı bize Hakkın hüdâsı **** Cihân toldı anın zürriyyetiyle Ki hadsiz enbiyâ vü evliyâsı **** Tolar cennet dahi evlâdı ile Değil beyhûde anın ibtilâsı **** Terakkî buldı ol suç-ıla Adem Bu hikmetler içündür ictirâsı **** İder Hak mağfiret suçın bileni Günâhı olsa da yir gök arası **** Musirr olma günâha çünki Şeytân O yüzden oldı la’net mübtelâsı **** Ana uyan cehennem ehlidir pes Musirr olanların nârdır cezâsı **** Bu Kuddûsî fakîrin pendini tut Dime kardaş anın sözi nolası Ahmed Kuddusi