Narı Işkıla Yanub Kül Olmayan Nadana Yuf

Nâr-ı ‘ışk-ıla yanub kül olmayan nâdâna yuf Ölmeden evvel ölüb dirilmeyen bî-câna yuf **** Kadrini ‘uşşâk-ı Hakkın bilmeyüb ta’n eyleyen Bed kelâm u bed likâ vü bed nefis hayvâna yuf **** Zu’m ider ki özi yahşi tâğiyândır ehl-i ‘ışk Yuf o tâgînin özine itdiği tuğyâna yuf **** Mü’minin budur nişânı ki seve mü’minleri Ehl-i îmâna ‘adâvet eyleyen düşmâna yuf **** Zemm ü istihzâ vü gıybet itmek anın ‘âdeti Ana insân deyü rağbet eyleyen insâna yuf **** Söyleyüb elfâz-ı küfri güldürür nâsı müdâm Dinleyüb anın kelâmın gülüşen yârâna yuf **** Ger gazab eylerse kalmaz anda aslâ ‘akl u dîn Bî-vefâ vü ‘akl u hem bî-dîn ü bî-îmâna yuf **** Kândır gamz u nemîme kizb ü sebb ü ifk ü zem Halk içinde fitneyi îkâz iden fettâna yuf **** Öğredirler anı hussâd şeyhe dahl eyle deyü Öğreden hussâda hem şeyhine taş atana yuf **** İ’tirâz eyler Cenâb-ı Hakka hem Cebrâ’île Şeyhine itmez mi yâ ol ‘âsî-yi Rahmâna yuf **** Asdikâyı fırka fırka eyleyüb İblîs gibi Ara yirde ceng ü gavgâ buğz u kîn koyana yuf **** Nân-ı ni’met ‘îş u sohbet hakkını nisyân idüb Şol kuduz hayvân gibi her gördiğin kapana yuf **** Çün ‘ayân oldı bu yüzden dostımız düşmânımız Bize dostluk gösterüb gizlü ‘adûv olana yuf **** İsteyen bizim rızâmız varmasun hîç yanına Bize rağmen ol sefîhin yanına varana yuf **** İtmeniz anınla ülfet ey bizim ahbâbımız Pes didik ol münkire yuf hem ana uyana yuf **** Hâsılı anda vefâ yok bilüriz lâkin ana Taş virüb Kuddûsîye ur diyüben salana yuf Ahmed Kuddusi